قصائد هزلية حلوة

صاحب العادة يرد لطباعة

أراد قاسم ان يكفر عن ذنوبه فذهب الى بيت الله الحرام ولما كانت ذنوبه في نظر الشاعر من الصعب ان تغتفر . كتب هذه يداعبه فيها

كون قاسم سوه هالطرگاعه **** لازم الصاحب گرب مطلاعه
كون قاسم صدك تنجح حجته **** أبسقر ربك بعد شنهي حاجته
عمره مالاحت التربه گصته **** ولاوصل ماي الوضو لذراعه
سامعين الصوت ياهو اللي سمع **** قاسم أبيا يوم هم صله وركع
لو گبل ممشاه نشد حاكم شرع **** البيت چاگله تنجس گاعــــــه
گلي من توصل لبيت الله الحرام **** بروح ابوك أتصلي لو تقره مقام
لو حصلك ربع زحلاوي تمام **** خافن تلطه وتعيف الطاعــــه
مكة ربك مابناهه ألها الشجول **** وانته صاحب طبع عنك مايزول
چبرالتربه وسبحتك خل تطول **** صاحب العاده يرد لطباعــــه
هوايه مثلك هم شفت راحوا واجو **** من طبايعهم ابـد مابطلوا
بوگـه او غش دومهم ماهودوا **** أشراف ما طنهم بگوا نص ساعه


لابس للشغل دشداشة نص اردان

كتب الى صديقه الحاج عبد العالي طاهر رئيس عشيرة بني سعيد في الكرمة . والذي اشتهر بالكرم واصلاح ذات البين . مداعبة يصوره فيها وكأنه بائع للطحين متخذا جانيا من مضيفه دكانا . داعبه مع يقينه بسعة صدره وعلو جنابه وسمو تفكيره

گصدنا للمضيف الظهر جوعانين **** لگينه الشيخ متحزم يبيع طحين
بيده المگطع وجدامه الميزان **** او لابس للشغل دشداشه نص اردان
والتمت عليه چومة من النسوان **** يصيحن فدوه الطولك تره عجلين
طيوبه يگلها شويه تانيني **** او حسنه يضحك الها وگال من عيني
او شتم نوفه وصرخ طشرتي اطحيني **** اوطرد دوخه ويگلها السره لحسوني
يربي صمه ابصمك من الحاسود **** او عسا عين التحسده يو رمد يو عود
وزن مضبوط وزنه اولا عليه منگود **** او من يوزن ايم الله اعليه عين ابعين
حجي وخايف الله او لايعرف ايخون **** حمولة اهله وفريضه يعجل المجنون
اله ثلث الگلاطة وخوش عنده افنون **** او حلاة الولد من خاله چسب ثلثين
امس وانته گليط ويرد ليك الشور **** مضيفك حبل طوله والدلال تفوح
ترسته طحين نمرة صفر يامسطور **** اللحد طمك وطم باجي الگطاعين
نفعك والتبوگه اربعطعش دينار **** مكدة شهر ماتسواش هذا العار
لونك سكن بين الناحيه والطار **** اولا كالساعة تتمعطر بجيس طحين


كــون سماچ اشتغل عبدالامير

اضطر احد اولئك الرؤساء ان يشتغل سماكا .فكتب اليه يداعبه قائلا

كون سماچ اشتغل عبد الاميـــر **** شنهي من مهنه بعد يلگه الفقير
جان من يركب دوافيعه عبيد **** والتفك برنو ويبرج من بعيد
راعي سطوه ومنه يخاف الحيد **** وعادته گول وفعل ما يستشير
وجان من يومي تدو بحله الزلم **** اثنينهن عنده الشجاعه والحلم
المكارم ورث من عوده الشهم **** الابو ورثه لعند ابنه يصير
لجن الايام مسرع ماتمر **** لابسه ثياب الخيانه والغدر
اشجم عظيم اضيعت دمه هدر **** اوجم لئيم الخدمته واصبح مشير
دارت ويا شومها لما تدور **** اوخلت الغربان تعله على الصگور
ايگول ربك صير ياعبدي صبور **** او لا اظن تصبر على هاي الحمير
وصار سماچ ولزم حبل الشبچ **** اشمحله طوله على الدوسه لودبچ
ملطخه اهدومه من ابطون السمچ **** والصدف لازگ بقمصان الحرير
نزع قاطه واحتزم فوك البشت **** وصار وجه من الشمس مثل الخفت
من يكض ميزانه مثله ماشفت **** عيارة مظبوط ويحط فوگه چثير
بالوزانه خوش مضبوط وسرع **** وبعد بيه خصله مسنع بالدفع
عنده شلبه موشره تشگ الدرع **** يشگ بيها السمچ شگ ماله نظير
ابسبحه الكهرب يعجبك لو لعب **** هسا بدلها بمعلاگة خشب
وعنده عرفه للسواحل لو گرب **** كلها تتنظر علم عبد الامير
ايگول اشكرنك على هذا اللطف **** تدري ظليت انه ادور عالگطف
عفيه ربنه اللي شطف حظنه شطف **** واخس منها خايف ايصير المصير


امبارك يــاحمد

ملا حمد واحد من عشائرهم ضاق بحياته الريفية فقصد النجف واصبح من رجال الدين وارتدى عمامه بدلا من عقاله وبزته الريفية فأرسل له قصيدته مازحـــاً

امبارك ياحمد من صرت علامه **** وبدلت العگال بلبس العمامه
بدلت العگال البيه چنت محلاك **** كسرته شلون كسره ومايل ليمناك
اشها لدولاب گلي الدولبك اوجاك **** ابن جكنوم شفته حسن هندامه
شگولن لل يگلي حمد شنهو الجاه **** اتعارض لو فطينه اتوالمت وياه
ثلث تشهر ضبط ماصارت الممشاه **** وفرد طمسه طمس بالعلم للهامه
يگول بثلث تشهر كملن ادروسي **** قريت الاجرميه وصرت قاموسي
وهسه اعمامته وبجامع الطوسي **** يباحث والحنك مسدول جدامه
لف طول اعلى راسه وطول لفه احزام **** تدهمج واليشوفه ايشوف چومة خام
لا يهجع نهاره ولا بليله اينام **** ايطورد بالعجود اتگول حجامه
كلشي حسبت ما حسبت ابهاي **** لن ملا حمد تحرير يفتي ابراي
جن طوله استكان وفوگه صحن الجاي **** من ذب العگال وطس العمامه
اهي مصبغه وركضولك ركض صبغوك **** للالفيه متگلي شوكت قروك
موصوجك ... تره صوج الذي دلوك **** وخلوك اتهرف والليل متنامه



تحياتي